عابر الضيقه

[آمنة المحبوبة]

الصدر صار لعابر الضيقه مكان
حتى غدا تحت امره ومنه واليه

حول بسيف الخوف في بر الامان
لحظة غدر ماكان قلبي محتسيه

واقام في صدري برمحه والسنان
هو لايبي قلبي وقلبي مايبيه

لكن من الفرقا ومن غدر الزمان
اللي يغيض وجيه ويفرح وجيه

توالفو لين اصبحو مثل الاخوان
ماهو غلا لكن محدود عليه

غيض النفوس اللي سهج صمت العيان
اليا ابتداه الصبر يعجز ينتهيه

حتى لو ان العدل بي جي له لسان
لايعتذر عذره ترا ماهو وجيه

تالي الزمن ضاقو وسيعين البطان
يوم الغبي قلط على شداد النبيه

ليه نتعاتب والزمن ماله ضمان
ايامنا تمشي كذا من غير ليه

الضيق راهي بال وسنينه سمان
ويدور اللي مايبيه ويبتليه

من راهن جروحه يجي قد الرهان
ويحد جرحه لين جرحه يشتكيه

الهون له وجه مقنع بالهوان
والعز له وجه عروقه تحتميه

اصنع لنفسك من حصون الشان شان
والا اجعل من الشان حصن وعيش فيه

لاتحسب طعونك ترا الوقت امتحان
هذا بعض ماعنده ومما لديه

للي يشد الانتباه ارخ العنان
اما خصمت الوقت خلك من ذويه

تدري متى تطلع على راس البيان
لاصار قلبك عاقل وكفك سفيه
​